काठमाडौं । विदेशीहरुका लागि सबैभन्दा बढी माग गरिएको भिसा अमेरिकी ए–१बी भिसाको आवेदन शुल्क अझ महँगो हुन लागेको छ।

अमेरिकी नागरिकता र आप्रवासन सेवा (यूएससीआईएस) ले एच–१बी भिसासहित धेरै आप्रवासन सेवाहरुको आवेदन शुल्क वृद्धिको घोषणा गरेको छ। यो वृद्धि यस वर्षको मार्च १ देखि लागू हुनेछ।

आवेदन शुल्क वृद्धिले विदेशी आप्रवासीहरुका लागि रोजगारीमा आधारित र गैरआप्रवासी आवेदनहरुको विस्तृत दायरालाई असर गर्नेछ। जसमा अमेरिकामा काम गर्ने वा अध्ययन गर्ने विदेशी नागरिकको ठूलो संख्या समावेश छ।

अध्यागमन विभागले जुन २०२३ देखि जुन २०२५ सम्मको महँगीलाई ध्यानमा राखेर प्रशोधन शुल्क समायोजन गरिएको जनाएको छ।

यूएससीआईएसद्वारा जारी गरिएको नयाँ शुल्क तालिकाअनुसार एच–१बी वा आर–१ गैरआप्रवासी स्थितिका लागि फारम आई–१२९ आवेदनहरुका लागि प्रिमियम प्रशोधन शुल्क १ हजार ६८५ डलरबाट बढेर १ हजार ७८० डलर हुनेछ। यस्तै एच–१बी, एल–१, ओ–१, पी–१ र टीएन भिसाहरुका लागि प्रिमियम प्रशोधन शुल्क २ हजार ८०५ डलरबाट २ हजार ९६५ डलरसम्म बढ्नेछ। आई–१४० आवेदनको शुल्क २ हजार ८०५ डलरबाट २ हजार ९६५ डलरसम्म बढाइएको छ।

यूएससीआईएसले बढेको आम्दानी एजेन्सीको सञ्चालनलाई समर्थन गर्न प्रयोग गरिने जनाएको छ। जसमा प्रिमियम प्रशोधन सेवाहरु प्रदान गर्ने, प्रशोधन ब्याकलगहरु हटाउने र यूएससीआईएसको न्यायिक र प्राकृतिकरण सेवाहरुका लागि कोष प्रदान गर्ने समावेश छ।

विदेशी नागरिकहरु संयुक्त राज्य अमेरिकामा एच–१बी कार्यक्रमका सबैभन्दा ठूला लाभार्थी हुन्। रोजगारीमा आधारित ग्रीन कार्ड ब्याकलगको एउटा महत्वपूर्ण भागका लागि तिनीहरु जिम्मेवार छन्। फलस्वरुप शुल्क वृद्धिले धेरै विदेशी पेसेवर, विद्यार्थी र रोजगारदातालाई असर गर्ने सम्भावना छ। यद्यपि, प्रिमियम प्रशोधन शुल्क पूर्ण रुपमा ऐच्छिक छ र मुख्यतया जागिर परिवर्तन, भिसा विस्तार र यात्रा योजनाजस्ता मामिलामा द्रुत निर्णय खोज्ने आवेदकहरुले प्रयोग गर्छन्।